شو اللي صار

شو اللي صار يا هالأيام فينا
متل شي نجم انطفى...بعتمة ليالينا
والدّني غير الدّني...والناس
خيال ولا ملامح...ولا إحساس
لا ضحكة من القلب تطلع
لا لفتة...ولا حدا يسمع
صوت البكي
والحَكي...غير الحكي
وملح العمر منّا ضاع
وبحر الشعر فاضي... بلا شراع
وبلا أسرار...
وسكن الهوا...وهاجر البحّار
والحلم غيمة...بليلة صيف
متل كذبة...أو شي طيف
لاح...
شو حلو...وراح !
وبقيت الأشباح
وذكرى...بالقلب خيبة
وبحور تفصلنا...وغيبة
وزمن غير الزمن
وخوف وقلق...عا وطن
وعا أهل الوطن
من أهل الوطن!

حكاية

كانوا اتنين...وحدن
بعتم الليل...بعدن
وقمر طالع
وجليد الصمت
أبرد من هوا تشرين
وتلج نازل
غطّى العشب بينن
كانوا اتنين...
هيَِ...وهوِّ
وفنجان قهوة...
برد حدّن!

كانوا اتنين
حديث قلوب...بلغة العين
ماضي وذكريات
متل أوراق الشجر...منثورة
صورة...ورا صورة
ورد يابس...وبيوت مهجورة
وغراب البين
مدري إجا من وين
وعمر غفلة مرق
وحلم اللي انسرق
منّن!

وتفرّقوا الاتنين
ونزلِ الشتي
من السما...والعين
وعلى الطرقات
صدى الأصوات
تحكي...عن اللي فات
وغاب القمر
وراحت القصة
وغصّة ورا غصّة
من بعد ضحكة
وصوت شاعر حكي
عنّن!

مهداة إلى صديقة

وتمضي الحياة بنا...
يا صديقة
يوم لها...ويومٌ لنا
أهي الحقيقة؟
دعيني إذاً...أعيش في الأوهام!
دربي...دربٌ مع الأحلام...
فهل تدري طريقه؟
وأنتِ...أتعلمين...
أيُّ دربٍ تسلكين؟
وهل تذكرين...
طفولةً مضت...من سنين؟
أغنياتها...أتسمعين؟
كم كنّا أبرياء...
نلهو...حتى المساء
ونحلم بالأجمل!
بلا حياء
و لا خجل!
اليومَ وقد كبرنا..
أحلامنا...هل خسرنا؟
فهل معي يا صديقتي
عنها تبحثين؟

عيد يارا

غنّوا...للحلو يارا
اليوم عيدا...والقمر جارا
شو بيحلى الورد حدّا
لونه... من لون خدّا
مطرح ما الصبح ندّى
وتمايلت أغصان الشجر
وتراقصت حبات المطر...
متل ما بدّا!
شو بدّك...يا عيون خالو
فيكِ الشعر...شو شاف حالو
يا ضحكة هالعمر...ما أجملها
إلك غنّوا..."يارا ال جدايلها"!
اليوم منّي هالهديّة
حلم وصلاة...وأمنيّة
تعيشي العمر...أيام ولا أحلى
وراحة بال...بحياتك كلها
وعقبال المية
يا من إلك وردي...والورد هيِّ!